[الوافي222]

السلام عليكم ورحمة الله وبركاتة
.
راح أبدا ع طول بدون مقدمات وكلام فاضي!

ان شاء الله راح افيدكم باللي شفته بنفسي وخاصة للمتقدمين من السنوات القادمة
اولا عن الكلية هي كلية تخرج ضباط للعمل في القوات الجوية الملكية السعودية
من تخصصاتها :
اولا تخصصات "جوي" (يسموها كذا عاد)
طيار (افضلها وأصعبها قبول فنفس الوقت)
ومشغل انظمة تسليح - ملاح جوي
بعدها التخصصات "فني" :مراقبة جوية-موجة مقاتلات-اممم شكلي ناسي وحدة المهم موجود كل شي بالموقع
بعدها "أرضي":ومنها إمداد (وهذي ثابتة اما البقية حسب الطلب والحاجة)
وأمن وهذي السنة هذي يوم رحنا عرضوها علينا يعني زي ما قلت تختلف من سنة لسنة
الكلية الجوية تعتبر أفضل كليات وزارة الدفاع(رأيي الشخصي)
......
بالعادة يفتح التسجيل بعد ظهور نتائج الثانوية ب إسبوع إ لى ثلاثة أسابيع بعد التسجيل في الموقع تنتظر رسالة الترشيح المبدئي غالبا بعد التسجيل بشهر وذا كتب الله ووصلتك الرسالة تدخل للموقع وتحجز موعد للفحص اذا اجتزت الفحص تنتظر القبول المبدئي وذا وصلك المبدئي ترجع لهم وتفحص دم وبول وكذا المهم بعدها اذا اجتزت تنتظر القبول النهااااااائي
وراح اتكلم عن الفحص وخاصة الجوية
بشكل عام للطيارين صعب وللفني والارضي عادي
اولا فيه العظام وهذا راح يشوف اذا فيك مثلا مشاكل بالعمود الفقري او في اصابعك يعني العظام بشكل عام-
وبعدها الطبيب النفسي وهذا عادي المهم لا ترتبك وخلك واثق من نفسك وترى الوضع عااادي وسهل اكثر مما تتصور
نسيتها بالترتيب لاكن منها الباطني (وهذا راح يفصخك ههههههه) وهو يشوف اذا عندك فتاق او دوالي وو الله يبعدها عنكم ويعافي من كانت فيه وبالمناسبة اعرف واحد ردوه بسبب الدوالي- والنظر وهي عيادتين للفني والارضي اما الطيارين تزود عليها بخمسة وما اخفي عليكم تراهم متشددين فالنظر اول عيادة يحط قدامك لوحة يمكن بعد 5 متر فيها علامة C والعيادة الثانية يفحص بآلة مدري عنها فيه زي الكشاف ينور بعينك وباقي العيادات الخاصة بالطيارين كل وحدة تختص بشئ معين- وفيه السمع يحطك فشي زي الثلاجة عازلة للصوت ويسمعك نغمات .وعيادة خاصة بالقلب- وقياس اطوال للطيارين فقط - وأسنان يفحص اذا كان فيك تسوسات او كسور بالاسنان اهم شئ الأسنان الامامية تكون سليمة الخلفية ماهي مهمة لاكن ما تكون خربانة كلها لا تكون بحدود المعقول انا عديت رغم فيني اربع تسوسات فالضروس الخلفية لاكن وسط او خفيفة واللي فيه تسوس يحشي اسنانة والحشو عادي ما يقولوا شئ
وفيه اخرى لاكن نسيتها المهم اللي فوق هذي اللي يرفضوا الغالب بسببها
وطبعا الواسطة عيني عينك لاكن ماعليكم فيهم اللي كاتبة الله يجيك
أما المقابلة فسهلة ولأحد يشيل همها أبد
ممكن يسالك عن انواع الطائرات موجودة عنده فصور منها يجيب لك صورة اف 15 او تايفون أو سي 130
وسالني انا قال متى فتحت الرياض ومتى توحدت المملكة وتكلم عن نفسك وقالي اكتب كلمة تكافؤ و مسؤولية ولكن و البعض كلمة ضابط ويخليك تحدد لك التخصصات اللي تبيها وتختار 3 وترتبها حسب الأولية وممكن يعرض عليك ابتعاث وفيه نوعين ابتعاث داخلي وخارجي . للي درجاتهم عالية الداخلي يدرس هندسة طيران الظاهر فجامعة الملك فهد للبترول والمعادن مني متاكد وخارجي اكثر من دولة تختلف من سنة لسنة
طبعا انت من بعد الفحص راح يحددوا هل تنفع طيار أو فني أو ارضي
مثلا لو مريت على العيون وشاف انك ما تنفع راح يكتب لك على الورقة A وتعني فني . طبعا لو بعد الفحص شافوا انك تنفع طيار يكتبوا على الورقة P ولو ارضي G
طبعا الطيار يفحص فعيادات كثيره اما الفني اقل والارضي اقل ايضا من الفني.
نرجع للمقابلة انا كنت اظن ان لو كنت مطلع فالطيران وفاهم فيه راح تنفعني وشلة همها لاكن فالنهاية فالمقابلة ماراح يفرقوا بينك وبين اللي من جنبها ولا هو مهتم وهاوي فالطيران يعني لا تتعب حالك وكذا ممكن ادق سؤال يسألك هو عن انواع الطائرات عندنا فالغالب الكل يعرفها يعني ريح ماراح يفاضلون بينكم وهذا اعتبره غلط منهم. /هذا اللي يحضرني عن الفحص والمقابلة
#######
اما الإختبار القدرات والانجليزي
هذا هو أهم شئ والكثير يهمل أهميته ع كلام عسكري يوم اختبرت يقول إنه أهم من المقابلة واللياقة !
مدة الإختبار حوالي 4 ساعات للقدرات والإنجليزي ساعة بس بالنسبة للإنجليزي جبت فيه العيد لأني من جنبها فالانجليزي وماني فاهم فيه لاكن اشوف الكثير حل وخلص قبل ينتهي الوقت !اما اللي ما خذوا الوقت كامل وحلوا لين انتهى غير انا واحد شكلها مثلي مضيع هههههههههه المهم ترى مو مهم بس يفرق في انك تكون الدفعة الاولى او الثانية لانك اذا قبلت اما دفعة اولى او الثانية وهي بعدها بثلاث شهور او شهرين اما القدرات هو المهم وهو يشوف قدراتك العقلية ومدى استيعابك وحفظك الاختبار مقسم اكثر من جزء كل جزء يختص بشئ معين فيه مثلا اختبار فيه نقطة وفيه خطين متقاطعين وعندك دعاسات وزي العصا تستخدمها الهدف من الاختبار انك تخلي النقطة تكون في في المركز
-واختبارات متعددة غيرها لايوجد فايدة من ذكرها لانهم راح يعلموك عنها
وللعلم ترى الكل يختر اختبار الانجليزي والقدرات حتى الفني والارضي المهم غالبها سهل لاكن يجب عليك انك تخلص قبل تمر الاربع ساعات لان لو باقي من الاختبار ونتهى الوقت وانت ماحليت راح يفوتك وينقص من درجاتك عندهم وايضا لا تشيل هم الفطور والغدا من عندهم اكلهم شغل عدل ههههههع
وووبعد هالاختبار اختبار اللياقة وترى مو بذيك الاهمية
وهو اولا اختبار 50 متر في اقصى وقت
بعدها اختبار التحمل وهو 600 متر المهلكة هههههع في دقيقتين ونصيحة لا تسرع من البداية خلك اول شئ هرولة وبعد 400 متر ادعسسسس بكل قوتك
--
بعده اختبار القفز وهو حول مترين لاكن حتى لو نقص عادي وايضا اختبار عضلات البطن وهو يثبتوا رجولك وتثني ركبتك وتحط يدينك ورا راسك وترفع ظهرك وتنزلة وتنزلة ومطلوب منك ثلاثين مرة ترفع وتنزل لاكن زي ما قلت يمشوا وبعدها الضغط وهو ايضا حوالي 30 عدة بس حاول تسويها مرونة وسهولة وتكون مدرب مهو بطلوع يادوب تشد نفيك لان فيه خصم درجات وبس..
(طبعا نسيت اعلمكم الترتيب اول يوم فحص طبي ومقابلة
بعدها من اليوم الثاني انجليزي وقدرات وثالث يوم لياقة غالبا ورا بعض لاكن بعض الاحيان تتوافق مع الجمعة والسبت ف يأجلونها للاحد مثلا... كل يوم تجيهم من الفجر واليوم اللي ممكن طول فيه هو يوم اختبار الانجليزي والقدرات يمكن تخلص غير بعد العصر
فالنهاية لاااا تشيل همها اكثر من اللازم لانك مهما سويت ماتضمن القبول/ ^وإستخير وأطلب الله الخيرة^/
هذا اللي عندي واللي اشوف ان عليك معرفتة كثير تكثر الاسئلة عنده ويشيل هم لاكن بحسب تجربتي وانا كنت مثلكم شايل همها وكنت مهتم بادق التفاصيل لاكن يوم فحصت وخلصت وكذا اكتشفت اني غلطان وجمعت فوق الاشياء المهمة واللي ممكن تفيدكم
وأعذرونا على عدم التنسيق والترتيب فكتابة الموضوع بسبب اني مستعجل
واكرر استخير واطلب الله الخيرة
واعتقد ان الأخطاء الاملائية عندي كثير فسامحوني عليها
.....
ان أخطأت في شئ او نسيت شئ فمن نفسي والشيطان
وإن اصبت فمن الله
ارجوا منكم الدعاء لي ♡]] والسلام عليكم ورحمة الله وبركاتة

[Yahya12]

السلام عليكم
شكراا اخوي الوافي بس معي سوال لو تكرمت
متى يبداء التسجيل في كلية الملك فيصل
حتى الآن ادور مالقيت مدري اذا باقي ماعلنو
وشكراا وأتمنى من الي يشوف الرد يجاوب

[alaqily2016]

وعليكم السلام
التقديم غالبا بعد الاختبارات بشهر تقريبا يفتح

[Yahya12]

شكراا
طيب انا جبت الثانويه ٩٩ والقدرات ٨٢ والتحصيلي ٧٩ تتوقع انقبل
بس اختبار الكفايات لازم اجيب كم فيه
والطول ١٧٠ والوزن ٦٧
وشكراا معليش طولت

[زياد السحيمي]

اقتباس:     المشاركة الأصلية كتبت بواسطة Yahya12  

السلام عليكم
شكراا اخوي الوافي بس معي سوال لو تكرمت
متى يبداء التسجيل في كلية الملك فيصل
حتى الآن ادور مالقيت مدري اذا باقي ماعلنو
وشكراا وأتمنى من الي يشوف الرد يجاوب

التسجيل فتح للجامعيين في اول ايام رمضان اما الثانويه للحين مافتح وسالت واحد قالي يفتح يوم السبت الي هو بتاريخ 9/8 والله اعلم

[زياد السحيمي]

السلام عليكم ياشباب
انا عندي سوال وياليت احد يفيدني
انا نسبتي بالثنويه 84,54 والقدرات 69 والتحصيلي 60 والطول 166 والوزن 65 فيه احتمال انهم يقبلوني وهل الاحتمال عالً او متوسط؟

وشكراً,,,,,,,,,,,,,,

[Yahya12]

لقد تم الإعلان عن موعد التسجيل
يوم السبت ١٥ رمضان وبالتوفيق للكل
للتأكد ادخل الرابط: ط¨ظˆط§ط¨ط© ط§ظ„ظ‚ط¨ظˆظ„ ط§ظ„ظ…ظˆط*ط¯

[زياد السحيمي]

يسر اللجنة المركزية لقبول طلاب الكليات العسكرية ولجنة قبول الجامعيين بوزارة الدفاع أن تعلن عن فتح باب القبول والتسجيل للالتحاق بالكليات العسكرية التابعة لوزارة الدفاع لهذا العام (1438هـ) إعتباراً من يوم السبت الموافق (1438/09/15هـ) وذلك لخرجي الثانوية العامة التابعة لوزارة التعليم تخصص (علوم طبيعية) . وعلى الطلبة الراغبين التسجيل زيارة الموقع الإلكتروني للجنة (بوابة القبول الموحد) على الرابط (ط¨ظˆط§ط¨ط© ط§ظ„ظ‚ط¨ظˆظ„ ط§ظ„ظ…ظˆط*ط¯
) والإطلاع على شروط القبول وإجراءات التقديم والقبول .
متمنين للجميع التوفيق ، والسلام عليكم.
ويمكن الاطلاع على شرح طريقة التسجيل من خلال الرابط التالي :

شرح لطريقة التسجيل في بوابة القبول الموحد لطلبة الثانوية العامة

[basem21]

لو سمحتم احد يرد علي
انا نظري ناقص ربع بس هل يقبلوني طيار (حتاج البس نظاره)

[wsamah]

ياشباب لو قبلوني الملك فيصل الجوية هل عندي امكانيه اصير طيار مدني بالتقديم على الخطوط بعد التدريب في الكلية ؟

[زياد السحيمي]

السلام عليكم ورحمة الله وبركاته
ومبروك عليكم الشهر الفضيل

مثل ماتشفون الموضوع هو ( كلية الملك فيصل الجويه 1438 )

انا فتحت الموضوع بمناسبة اقتراب البدء في تسجيل كلية الملك فيصل الجويه وهدفي من هذا هو ان نتبادل المعلومات او نصائح
تفيدنا بالكلية ولهذا نرجوا للجميع بالمشاركة لاي معلومه يعرفها عن الكلية سواً ان كان شخص متخرج من الكلية او شخص يريد التسجيل بالكلية

واسف اذا كان هناك اخطاء والله يوفق الجميع
وشكراً,,,,,,,

[طيار39]

حياك الله وبياك اخي الفاضل انا تم فحصي طبيا واجتزت فحص الطيارين والمقابلة ثم بعد ذلك دخلت اختباراتهم واللياقه واجتزتها
الان ننتظر القبول المبدئي
متى يكون وهل للجوي الافضليه
وهل تتوقع قبولي الثانوي 96
القدرات88
التحصيلي 77
الكفايات 41
ارجووووكم افيدوني قالوا لي ناس النتائج في منتصف شهر 11/1438