[مبارك البوعينين]

بسم الله الرحمن الرحيم

السلام عليكم و رحمة الله و بركاته

كيفكم اخباركم و احوالكم يا منتدانا الغالي اعضاء و ادارة ، قبل كل شيء حاب اعرفكم على نفسي انا اخوكم مبارك عمر البوعينين من المملكة العربية السعودية من مدينة الجبيل الصناعية طبعا هواية الطيران التشبيهي بدت معي صدفة او بالغلط مدري شلون المهم انه مو من زمان بس كل السالفة اني شفت ان جرير مسوين تخفيضات على الفلايت اكس جولد ايديشن :jumping: و توه نازلي اول راتب بدون شعور شريت الفلايت و شريت جويستيك مدري وش الطبخة قلت بروح اطقطق لين ربي يفرجها و من بعدها ادمنتها الشاهد في السالفة و لا لكم بالطويلة اني عشقت هذه اللعبة لين عرفت ان بالكويت في مركز للطيران التشبيهي و عندهم بروفشينال كوكيبت للطائرة الشهيرة A320 صدق اني تحطمت عشانها مو بوينق " من عشاق البوينق " بس قلت ما عليه نجرب و الحين اوريكم صور تجربتي و بعدين اكمل لكم سواليف :

خلونا نطير مع الـA320

* التحقق من التشيك ليست حق الطائرة قبل الاقلاع


* اشرح لخويي الي جا معي و كان اول مرة في حياته يتعرف على ماهية المحاكي





* الروتيشن و الاقلاع


* البانليز خلال التاكسي و جالس اتناقش انا و المدرب الي معي


* و انا جالس ابرمج الـFMC على الروت الجديد حسب توجيهات المدرب


* صور تذكارية انا و صديقي






و كان عندي فيديو بس مدري وينه لبداية الرحلة ( ستارت ينجين و التاكسي حتى الاقلاع) بس احصله بنزله لكم على طول .

اتكلم لكم عن المركز و اعطيكم بعض المعلومات عنه
هذا موقع المركز على الانترنت : https://www.kuwaitfsc.com/
المركز في الديسكفري مول بالكويت قريب من ابراج الكويت طبعا المركز عندهم 10 كوكيبت عادي مو بروفشنال لطائرات اير باص و بوينق و سيسنا و عندهم وحدة اف 16 و وحدة اف 18 هورنت و وحدة للهليكوبتر الشينوك و البروفشينال وحدة بس للايرباص 320 طبعا الاسعار كالتالي :
جميع الكويبيت العادي الساعة بـ10 دينار كويتي اي ما يعادل 135 ريال سعودي تطير فيها بدون مدرب او مساعد طيار براحتك على جوك
البروفشينال الساعة ب35 دينار كويتي اي ما يعادل 460 ريال سعودي تقريباً مع المدرب و اذا كنت مرة محترف تقدر تطير لحالك بس برضو لازم يكون موجود الموظف كمساعد طيار و عشان ينتبه للاجهزة لان الكبينة الاحترافية هاذي جدا جدا غالية قيمتها تقارب 400000 ريال سعودي

طبعا انا طرت من مطار الكويت الى الرياض او الدمام ما اذكر على متن الخطوط السعودية و استمتعت صراحة بالتجربة و انصحكم تجربونها بتفلس فيكم قسم ههههههههه.


في الختام اتمنى ان الموضوع ينال اعجابكم و لا تحرمونا من تعليقاتكم و تقيمكم .
و السلام مسك ختام ( السلام عليكم و رحمة الله و بركاته )
أخوكم / مبارك الـــبوعــيـنــيــن

[صغير بس خطير 2011]

ماشاء الله مبرووك على التجربة

وان شاء الله نجربها

ومرحبا بك في هذا المنتدى الذي ستجد فيه الكثير والكثير

[مبارك البوعينين]

اقتباس:     المشاركة الأصلية كتبت بواسطة صغير بس خطير 2011  

ماشاء الله مبرووك على التجربة

وان شاء الله نجربها

ومرحبا بك في هذا المنتدى الذي ستجد فيه الكثير والكثير

اشكرك على مرورك و ننتظر تجربتك

[alzaiem]

السلام عليكم

تقرير جميل جدا و تجربة رائعة , و نتمنى وجود جهاز مشابه له عندنا في السعودية. هناك طعم خاص للطيران في اجهزة المحاكي البروفيشينال ..... اسأل مجرب :)

تحياتي لكم

[Dr.Alrefaey]

لو بتحب البوينج موجود بالكويت سميولاتر بوينج 737NG موجود بمول 360 . اسال عن مركز بوينج هناك. تقرير جميل اخي وفقك الله

[مبارك البوعينين]

اقتباس:     المشاركة الأصلية كتبت بواسطة alzaiem  

السلام عليكم

تقرير جميل جدا و تجربة رائعة , و نتمنى وجود جهاز مشابه له عندنا في السعودية. هناك طعم خاص للطيران في اجهزة المحاكي البروفيشينال ..... اسأل مجرب :)

تحياتي لكم

اشكر مرورك و اا فكرت اني اسوي لي مشروع زي كذا عندنا بالسعودية بس امتنعت لسببين الاول : تكلفة الكبينة عالية جدا جدا تقارب سعر طائرة سيسنا حقيقية شي مبالغ فيه قريب النص مليون ريال .
الثاني : لو فتحته هنا بالسعودية هل بيكون عليه الاقبال كبير و اذا كان كذلك هل المقبلين على ها الشيء ممكن انهم يدفعون 450 ريال للساعة

استفسارات كثيرة ممكن اننا نطرحها موضوع للنقاش و نسوي استبيان عليها و انا افكر بها المشروع بشكل جدي حيث انه يكون سابقة و ودي ادمج معه مركز للبينت بوول بعد كعامل جذب للزوار

[مبارك البوعينين]

اقتباس:     المشاركة الأصلية كتبت بواسطة Dr.Alrefaey  

لو بتحب البوينج موجود بالكويت سميولاتر بوينج 737NG موجود بمول 360 . اسال عن مركز بوينج هناك. تقرير جميل اخي وفقك الله

اشكر مرورك على مشاركتي و نورت ، مركز بوينج اعرف عنه بس ذاك اليوم الميزانية كانت مخرخرة شوي و البوينج اغلى فقلت دامها بخاطري بنروح نجرب الايرباص بس صراحة بعد ها التجربة البروفيشنال حبيت الاير باص و لو سعرها رخيص حبتين كان سويت لي وحدة في حوش البيت و احلى طيران كل يوم استهلكها صصح

[ABODY_A_H_M]

يعطيك الف عافيه بس الي بعشره دينار طيران عشوائي

[مبارك البوعينين]

اقتباس:     المشاركة الأصلية كتبت بواسطة ABODY_A_H_M  

يعطيك الف عافيه بس الي بعشره دينار طيران عشوائي

الي ودك تبيه عشوائي تبيه مخطط الي ودك

و حبين انوه على شيء ترى عندهم برج مراقبة يتكلم مع كل الكباين الي بالمركز بس من سوء حظي ذاك اليوم ما في موظفين واجد فالمدرب الي قاعد جنبي هو مثل دور ATC و يعطيني التوجيهات بتغيير الروت و الهبوط و ما الى ذلك

[مثل العسل]

ما شاء الله عليك
تجربة ممتازة لك للمحاكي
انا نفسك جربت المحاكي سنة 2012 ومثل ما تفضلت كانت تجربة لي ولا اروع منها
وطلعت من سلطنة عمان للكويت لتجربة المحاكي فقط لمدة يوم وحده بس
واتمنى اني اكرر التجربة مرة ثانية باذن لله تعالى